Lions á Íslandi

Til Íslands barst Lionshreyfingin árið 1951 þegar fyrsti klúbburinn, Lionsklúbbur Reykjavíkur, var stofnaður hinn 14. ágúst. Ísland er sjálfstætt fjölumdæmi innan Alþjóðasambands Lionsklúbba og nefnist fjölumdæmi 109 sem síðan skiptist í umdæmi 109A og 109B. Í umdæmi A eru 50 klúbbar með 1.323 félaga og í umdæmi B eru 39 klúbbar með 972 félaga. Lionsfélagar á öllu landinu eru þannig í dag 2.295 talsins. Einn Lionnessuklúbbur er starfandi. Í Lions vinna saman konur og karlar, ungir og aldnir. Framan af var Lions eingöngu félagsskapur karla. Konur komu inn í hreyfinguna með stofnun Lionessuklúbba. Árið 1987 fengu konur sama rétt og karlar í Lionsklúbbum. Í dag eru konur um 20% félaga og er markvisst unnið að fjölgun kvenna í Lionshreyfingunni. Lionsfélagar láta gott af sér leiða á sviði mannúðar- og menningarmála. Klúbbar styðja sitt byggðarlag og taka þátt í landsverkefnum og alþjóðlegum verkefnum. Lionsfélagar leggja lið þeim sem minna mega sín, m.a. sjúkum, sjóndöprum og fötluðum. Einnig eru verkefni tengd börnum, öldruðum, menningarmálum og umhverfi. Íslenskir Lionsklúbbar taka þátt í alþjóðastarfi Lions.