Slökkviliði Snæfellsbæjar barst góð gjöf í byrjun apríl. Lionsklúbbur Ólafsvíkur færði þeim neyðarsög sem á enskri tungu ber heitið Cutters Edge Fire Rescue Saw, leysir hún gömlu sögina af hólmi sem komin var á tíma. Þetta er sög sem gengur fyrir bensíni, blaðið í henni er hægt að nota á nánast allt, til dæmis bíla, timbur, steypu og einnig til að rjúfa þök. Er þetta Slökkviliði Snæfellsbæjar kærkomin gjöf og vildi Svanur Tómasson, slökkviliðsstjóri koma á framfæri þakklæti til Lionsmanna fyrir hana. Gjöfin var afhent í blíðviðri á æfingu hjá slökkviliðinu á mánudagskvöldið.
Gjöfina afhendir Lionsklúbbur Ólafsvíkur í tilefni af 40 ára afmæli klúbbsins sem haldið verður formlega í dag 20. apríl 2013!

Ungmennafélögin Víkingur Ólafsvík og Reynir Hellissandi fengu afhenta góða gjöf á dögunum þegar Lionsklúbbur Ólafsvíkur færði fimleikadeildinni jafnvægisslá. Er þetta kærkomin viðbót við þau áhöld sem fyrir eru og mun auka fjölbreytileika í æfingum. Þessi jafnvægisslá gerir það kleift að æfa afstökk. Batnar því aðstaða til fimleikaiðkunar en mikil áhugi er á fimleikum og hefur fjöldi barna hefur æft undanfarin þrjú ár. Á myndinni er Vigfús Örn Gíslason félagi í Lkl. Ólafsvíkur og svæðisstjóri að afhenda gjöfina.

Alþjóðaforseti Lions Wayne Madden og Linda kona hans hafa um páskana verið í heimsókn á Íslandi, á páskadag heimsóttiu Wayne og Linda ásamt 12 manna föruneyti Snæfellsnes. Wayne hafði sérstakann áhuga á að koma á Snæfellsnes og skoða Snæfellsjökul þar sem að ein af hans uppáhalds bókum var „Leyndardómar Snæfellsjökuls“ eftir Jules Verne, einnig þótti honum mikið til um fjölda lionsfélaga á Snæfellsnesi og hafði hann á orði að Snæfellsbær væri það sveitarfélag í heiminum sem státaði af hæsta hlutfalli lionsfélaga, tæplega 7% íbúa Snæfellsbæjar er í Lions.

Wayne og Linda byrjuðu á að heimsækja Gestastofuna á Hellnum, þar sem lionsklúbbarnir í Snæfellsbæ tóku á móti þeim með léttum morgunverði áður ern Gestastofan var skoðuð, því næst var ekið að Vatnshelli og hann skoðaður. Ekið var um sveitarfélagið og skoðuðu gestirnir verkefni sem lionsklúbbarnir hafa komið að, auk þess sem dáðst var að náttúrunni. Heimsókninni í Snæfellsbæ lauk svo í Klifi þar sem boðið var uppá fiskisúpu, Wayne Madden hafði óskað eftir að sem flestir lionsfélagar kæmu að hitta hann, þrátt fyrir að mjög margir hafi verið á faraldsfæti um páskana þá sáu lionsfélagar sér fært að mæta í Klif og hitta alþjóðaforsetann áður en gestirnir héldu áfram för sinni um norðanvert Snæfellsnes.

Á myndinni er Wayne Madden alþjóðaforseti Lions í miðjunni ásamt fulltrúum lionsklúbba í Snæfellsbæ, frá vinstri er Svanhvít Ásmundsdóttir formaður Lkl. Þernunni, Einar Magnús Gunnlaugsson formaður Lkl. Ólafsvíkur, Björg Bára Halldórsdóttir formaður Lkl. Ránar og Friðþjófur Sævarsson gjaldkeri Lkl. Nesþinga.

Fertugur í fullu fjöri

Lionsklúbburinn Bjarmi á Hvammstanga hélt upp á fertugsafmæli sitt þann 6. apríl s.l. Klúbburinn var stofnaður þann 2. mars 1973 og er móðurklúbbur hans Lionsklúbbur Hólmavíkur. Á þessum 40 árum hefur klúbburinn haldið 625 bókaða fundi og alls hafa 109 félagar verið um lengri eða skemmri tíma í klúbbnum. Tveir stofnfélagar hafa verið samfellt í klúbbnum frá upphafi þeir Brynjólfur Sveinbergsson og Stefán Þórhallsson. Félagar í Lionsklúbbnum Bjarma eru nú 24 talsins.

Í tilefni af 40 ára afmælinu gaf Bjarmi út veglegt afmælisrit upp á 16 síður, myndskreytt og prentað í lit. Ritinu var dreift inn á hvert heimili í Húnaþingi vestra og víðar. Einnig má nálgast afmælisritið inn á vefnum lions.is á heimasvæði Lkl. Bjarma. Útgáfa ritsins var fjármögnuð með auglýsingum og einnig styrkti Menningarráð Norðurlands vestra útgáfu þess. Laugardaginn 6. apríl var opin sýning á ýmsum munum og myndum úr sögu klúbbsins. Aðgangur að sýningunni var ókeypis og gestum boðið upp á kaffi, öl og nýbakaðar kleinur.

Lokapunktur afmælishaldsins var síðan glæsileg afmælishátíð, þríréttaður hátíðarkvöldverður, sem haldin var í Félagsheimilinu á Hvammstanga. Í veislunni voru auk nær allra félaga í Bjarma og maka þeirra margir fyrrverandi félagar í klúbbnum og aðrir gestir alls um 80 manns. Sérstakir boðsgestir á afmælishátíðinni voru Kristinn Kristjánsson fjölumdæmisstjóri og Þorkell Cýrusson varaumdæmisstjóri í 109 B og eiginkonur þeirra. Einnig voru mættir 2 félagar úr Lionsklúbbi Hólmavíkur og formaður Lionsklúbbsins Höfða á Hofsósi. Gestirnir ávörpuðu samkomuna og færðu Bjarmamönnum góðar gjafir sem við kunnum þeim alúðarþakkir fyrir. Fulltrúar safnaðanna í sveitarfélaginu veittu viðtöku styrk að upphæð 200 þúsund frá Lkl. Bjarma til barna- og æskulýðssstarfs kirknanna, en peningarnir voru afrakstur af sölu á blómum um páskana.

Félagar í Bjarma heiðruðu sérstaklega stofnfélagana þá Brynjólf Sveinbergsson og Stefán Þórhallsson með heiðursorðum frá klúbbnum fyrir áralöng vel unnin störf. Einnig sæmdi formaður Bjarma þá Einar H Esrason og Eggert Karlsson heiðursorðu formanns fyrir rúmlega tveggja áratuga farsælt lionsstarf. Veislustjóri var Magnús Magnússon formaður afmælisnefndar, stjórnaði hann hátíðinni af röggsemi og flutti ýmiss gamanmál. Brynjólfur Sveinbergsson og Guðmundur Haukur Sigurðsson fluttu brot úr sögu klúbbsins. Nokkrir yngri félaganna í Bjarma flutt skemmtiatriði sem gerður var góður rómur að m.a. brugðu þeir sér í gervi stjórnar klúbbsins og var mál manna að það hefði tekist einstaklega vel. Félagar í Lkl. Bjarma hafa lagt á sig mikla vinnu á undanförnum mánuðum við undirbúning og framkvæmd þessara viðburða og eru þeim færðar bestu þakkir fyrir frábært sjálboðaliðastarf.

Guðmundur Haukur Sigurðsson
Formaður Lionsklúbbsins Bjarma

Myndir úr veislunni:

Á fundi Foldarkvenna í febrúar kom fram tillaga um hvort klúbburinn vildi taka þátt í ,,The Reading Action Program“ sem hér á landi gengur undir átaksheitinu ,,Lestrarátak Lions“. Wayne Madden alþjóðaforseti Lions hefur átakið á stefnuskrá sinni og fékk það samþykkt í alþjóðastjórn að verkefninu verði haldið áfram næstu 10 ár.

Tillagan var samþykkt og af því tilefni gerðist Lionsklúbburinn Fold bókavinur Seljaskóla þann 9. apríl 2013. Þann dag heimsóttu Foldarkonur skólann og færði klúbburinn bókasafni skólans 100.000 króna framlag til bókakaupa. Bókasafnsvörður skólans hafði fengið að vita af gjöfinni og sá hún um bókakaupin og nú hafa tugir nýrra bóka bæst við bókakost skólans börnunum til mikillar gleði. Allar bækurnar eru merktar með kveðju frá Lionsklúbbnum Fold og þeim fylgja líka bókamerki. Sama dag var öllum 10 ára börnum skólans færð bókamerkin sem Lions á Íslandi hefur látið gera. Skólastjórnendur fögnuðu þessari höfðinglegu gjöf og sögðu að það væri ekki oft sem skólanum væru færðar slíkar gjafir.

Á þessum sama klúbbfundi í febrúar var ákveðið að Lkl. Fold gæfi 300.000 krónur í söfnunarátak vegna 40 ára afmælis Grensásdeildar LSH.Þau félög sem hafa notið líknarsjóðs Foldar undanfarið eru: Ljósið sem er endurhæfingar-og stuðningsstöð fyrir fólk sem hefur fengið krabbamein og aðstandendur þeirra og Félagið Heyrnarhjálp vegna 75 ára afmælis þess. Nú í apríl sótti Fold um styrk til íslenska hjálparsjóðsins til að geta hjálpað fjölskyldu sem á um sárt að binda vegna alvarlegra veikinda og fékk góða úrlausn hjá sjóðnum. Foldarkonur halda árlega svokallað dömukvöld til að fjármagna líknarsjóð þá er boðið upp á  happdrætti, skemmtiatriði og mikinn söng. 

f.h. Lionsklúbbsins Foldar
Hrund Hjaltadóttir

Lionsstarf í okkar klúbbi gengur mjög vel og góð mæting er á félagsfundi.  Okkur hefur gengið býsna vel að yngja upp í klúbbnum og hafa nýju félagarnir  farið í Leiðtogaskólann sem ég tel vera grunninn að góðum lionsfélaga..  Ég tel allavega að ég hafi orðið betri og  nytsamari félagi fyrir klúbbinn eftir að hafa farið í þennan skóla.  Ég var reyndar svo tregur að ég fór tvisvar en það er nú önnur saga.  Formaðurinnn hefur haldið vel um stjórnartaumana og séð til þess að skemmtilegir og fræðandi fyrirlestrar hafa verið á okkar félagsfundunum..  Við höfum verið að styrkja Björgunarsveitina Þorbjörn, RauðaKrossinn, Sambýli fatlaðra og marga fleirri sem ekki verður getið hérna.  Tekið þátt í samvinnuverkefni með öðrum Lionsklúbbum á Suðurnesjum.

Elsti gesturinn, Gísli Hólm Jónsson, 92 ára.

Willard Fiske, Ólafur Ragnar formaður Lionsklúbbsins og Jónatan.

Okkar langstæsta fjáröflun , KÚTMAGAKVÖLD,  fór fram föstudaginn 15. mars undir styrkri stjórn Gunnlaugs Ú Gunnlaugssonar formanns nefndarinnar. Þar mættu rúmlega 300 manns og samkomunni stýrði Gísli Einarsson af skörungsskap.  Meðal skemmtiatriða voru Matti og Eyþór Ingi (idol) Þeir fóru á kostum og sýndi Eyþór Ingi á sér nýja hlið þegar han brá sér í líki Ladda.  Góð skemmtun hjá þeim.

Gunnlaugur formaður kútmaganefndar.

Stjórnarskiptafundur verður hjá okkur 16. maí og þá taka við þeir Einar Bjarnason, formaður, Sigurður Ingvason, gjaldkeri og Halldór Karl Hermannsson, ritari.

Gunnar Vilbergsson
Lionsklúbbi Grindavíkur

Í tilefni þess að Lionsklúbburinn Bjarmi er 40 ára um þessar mundir hefur verið gefið út afmælisrit.  Hér að neðan er hægt að sækja rafræna útgáfu af því.

Rafræn útgáfa  >>>>>>

 

Starfsfólk HVE vinstra megin og stjórn Lkl. Akraness hægra megin með formanni áhaldakaupasjóðs.  Starfsmaðurinn lengst til vinstri er einnig Lionsfélagi

Þann 25.mars síðastliðinn afhenti Lionsklúbbur Hveragerðis Heilsugæslunni í Hveragerði hjartalínuritstæki af vönduðustu gerð. Tæki þetta er tengjanlegt við tölvu og hægt að senda niðurstöður úr tækinu t.d. á hjartadeildir sjúkrahúsanna.

Fjáröflunartónleikarnir í Hveragerðiskirkju stóðu undir þessari gjöf.
Þór Hreinsson fór fyrir verkefna og fjáröflunarnefndinni að þessu sinni og niðurstaðan voru frábærir tónleikar núna í haust sem gerðu þetta kleift.

Ekki má gleyma því að það eru í raun  Hvergerðingar sjálfir sem standa á bakvið þessa gjöf með því að mæta á fjáröflunarviðburði.  Einnig nutum við ríkulegs stuðnings ýmissa aðila og tónlistarfólks. Má þar nefna Fjallabræður, Ragnar Bjarnason, Magnús Þór Sigmundsson og svo Allrahanda sem fluttu Fjallabræður ofl.

Það má einnig geta þess að fyrir rétt um ári síðan færði Lionsklúbbur Hveragerðis Heilsugæslu Hveragerðis og Dvalarheimilinu Ási þvagblöðruskana að gjöf. 

Hér tekur Ómar Ragnarsson læknir Heilsugæslunnar við tækinu úr hendi Rögnvaldar Pálmasonar formanns LKL Hveragerðis.  Á milli þeirra stendur Þór Hreinsson formaður verkefna og fjáröflunarnefndar.