Mið. 2. nóvember 2009
Mikill kraftur í starfi Lionsklúbbs Grundarfjarðar
Klúbbstarfið hófst í september þegar ný stjórn lagði fram starfsskrána með funda- og verkefnaplani sem og skipan í flokka og starfsnefndir vetrarins. Fundað er alla jafnan fjórða miðvikudag í mánuði í Fákaseli sem er félagsheimili hestamanna í Grundarfirði. Fundirnir eru matarfundir og er eldamennskunni skipt á milli flokkanna en allir greiða fast gjald fyrir matinn og rennur ágóðinn í félagssjóð. Stærstu fjáröflunapóstar í starfinu eru fermingarskeytasala hvert vor en auk þess hefur sala á fiskisúpu á bæjarhátíð Grundfirðinga verið drjúg tekjulind sem og jólamarkaður sem hefur verið að vaxa í umsvifum eftir að sala jólatrjáa bættist við annan varning.

Laugardaginn 24. október sl. var haldinn sérstakur kynningardagur félagasamtaka í samkomuhúsi Grundarfjarðar og var Lionsklúbburinn að sjálfsögðu með kynningu á sínu starfi þar. Félagar í Lionsklúbbi Grundarfjarðar eru nú 36 talsins af báðum kynjum. Á síðasta ári styrkti Lionsklúbburinn starfsemi Tónlistarskólans, Dvalarheimilisins Fellaskjóls auk þess að styrkja fjölskyldu langveiks drengs. Formaður Lionsklúbbs Grundarfjarðar er Ragnheiður Þórarinsdóttir.

Mið. 2. nóvember 2009
Starfið komið á fullt hjá Muninn í Kópavogi
Starfið hófst af krafti í haust með sjóstangaveiði og kirkjuferð aldraðra og framundan eru sykursýkismæling með öðrum Lionsklúbbum í Kópavogi. Lesið nánar um starfið í Muninn með því að smella hér.

Mið. 14. október 2009
Frábær árangur Lkl. Önundarfjarðar í fjölgunarmálum
Lionsklúbbi Önundarfjarðar hefur aldeilis tekist að blása meira lífí í klúbbinn á þessu ári með fjölgun félaga. Þeim hefur tekist að fjölga félagsmönnum um 10 eða frá því að vera 11 talsins, í byrjun janúar á 2009, upp í 21 nú í október.

Nú á seinasta fundi voru 4 teknir inn í Lionsklúbb Önundarfjarðar en hinir nýju meðlimir eru: Teitur Björn Einarsson, Hinrik Rúnar Haraldsson, Jón Magnússon og Gunnar Ævar Jónsson. Viðstaddur fundinn var Kristinn Hannesson, umdæmisstjóri 109B. Kristinn hélt smá erindi fyrir fundargesti og hafði meðal annars orð á því hversu ánægður hann væri með Lkl. Önundarfjarðar að hafa frá stofnun klúbbsins séð um blysför Flateyringa að áramótarbrennum þeirra ásamt því að hafa tekið þátt í uppbyggingu ýmissa verkefna á Flateyri og nágrenni.

Þó fjölgun félaga hafi verið vonum framar að þá stefna meðlimir á að gera enn betur í nánustu framtíð. Grétar Eiríksson Lkl. Önundarfjarðar.

Fös. 12. júní 2009
Glæsilega myndir í ljósmyndasamkeppni Lions
Nýlega var haldin alþjóðleg náttúruljósmyndasamkeppni Lions og hlutu nokkrar myndir viðurkenningar hér á landi.

Þri. 17. mars 2009
Kútmagakvöld Lionsklúbbs Grindavíkur
Lionsklúbbur Grindavíkur heldur hið margumtalaða Kútmagakvöldi föstudaginn 27. mars nk. Kl; 18:00, og er þetta kvöld stærsta fjáröflun klúbbsins. Boðið er upp á yfir 50 rétta sjávarréttahlaðborð auk fjöldi annarra skemmtiatriða. Skemmtun þessi hefur alltaf verið vel sótt og hafa færri komist að, en viljað. Hægt er að fara inná heimasíðu klúbbsins og skoða auglýsingu um Kútmagakvöldið.

Lau. 22. nóvember 2008
Hagyrðingakvöld í Aratungu
Hagyrðingakvöld í Aratungu. Lionsklúbburinn Geysir í Biskupstungum stóð fyrir hagyrðingakvöldi laugardagskvöldið 15. nóvember síðastliðinn. Þessi vel heppnaða menningarsamkoman var haldin í félagsheimilinu Aratungu í Biskupstungum. Einvalalið hagyrðinga var kallað til. Það var skipað Hjálmari Jónssyni Dómkirkjupresti, Jóni Kristjánssyni fyrrverandi alþingismanni, Sigurjóni Jónssyni frá Skollagróf í Hrunamannahreppi, Jóni Ingvari Jónssyni hugbúnaðarfræðingi og Sigrúnu Haraldsdóttur Húnvetningi og hestakonu. Þarna var dýrt kveðið og oft á tíðum fast skotið. Samkoman var vel sótt og auðfundið að gestir skemmtu sér virkilega vel. Svo mikið var hlegið að dæmu voru um að menn væru þjakaðir af magaverkjum næstu daga á eftir. Þegar presturinn var kominn á mikið flug orti Sigurjón:

Nú Dómkirkjuprestur er dottinn í stuð
Og djöfull erfitt að topp´ann
En almáttugur elsku guð
Ertu nú til í að stopp´ann

Frá vinstri : Hjálmar Jónsson, Sigurjón V. Jónsson, Jón Kristjánsson, Sigrún Haraldsdóttir, Ólafur G Einarsson og Jón Ingvar Jónsson.

Það var enginn annar er Ólafur G Einarsson fyrrverandi ráðherra og forseti Alþingis sem stjórnaði hópnum. Hann sýndi snilldartakta í sýnu hlutverki og laumaði hann að mörgum góðum sögum sem vöktu ekki minni kátínu en kveðskapurinn. Þetta er í fyrsta sinn sem klúbburinn stendur fyrir samkomu af þessu tagi. Hagyrðingarnir og liðstjórinn gáfu vinnu sína og sveitarfélagið lánaði húsið endurgjaldslaust. Klúbbfélagar kunna bestu þakkir fyrir. Ágóði af samkomunni rennur að sjálfsögðu til líknarmála. Stjórn Lk Geysis.

Fim. 20. nóvember 2008
Lionsmenn gáfu Hlévangi tækjabúnað

Lionsklúbbur Njarðvíkur færði í gær hjúkrunarheimilinu Hlévangi tæki að gjöf að andvirði 1,5 milljónum króna. Um er að ræða tvö tæki, annars vegar fullkominn mæli sem mælir magn í þvagblöðru og sparar marga sjúkrahúsferðina að sögn þeira sem til þekkja. Hitt tækið er súrefnissía sem framleiðir súrefni úr andrúmsloftinu og leysir af hólmi fyrirferðarmikla súrefniskúta auk þess að minnka kostnað vegna kútaleigu og súrefniskaupa.
Þetta er ekki í fyrsta skipti sem Lionsmenn í Njarðvík koma færandi hendi til Dvalarheimila aldraðra á Suðurnesjum því áður hafa þeir m.a. gefið lyftara og svokallaða skutlu. Klúbburinn á 50 ára afmæli á þessu ári.

Líknarsjóður klúbbsins hefur verið fjármagnaður með árlegu bílahappadrætti sem klúbburinn stendur fyrir á aðventunni. Suðurnesjamenn hafa ávallt stutt nálefnið dyggilega og er það von félagsmanna að svo verði einnig nú þegar sala á happadrættismiðunum hefst á næstunni.

Þri. 25. mars 2008
Kútmagakvöld Lkl. Grindavíkur
Lionsklúbbur Grindavíkur hélt sitt árlega kútmagakvöld föstudaginn 14. febrúar sl.  Alls mættu um 300 manns á þessa frábæru skemmtun, en hún hefur upp á að bjóða góða skemmtikrafta, vörukynningar frá ýmsum fyrirtækjum og 40-50 fiskrétti.
Kvöld þetta er umtalað fyrir gæði og leggja Lionsmenn mikið upp úr því að það takist vel.  Flestir félagarnir lögðu mikið á sig svo kvöldið gæti heppnast sem best.
Skemmtikraftar að þessu sinni voru Valdimar Hilmarsson baritónsöngvari, Jóhannes Kristjánsson eftirherma, Prímadonnurnar sem eflasut margir minnast frá umdæmisþinginu sem var haldið á Akranesi fyrir um tveimur árum að mig minnir. 
Bjarni Harðarson var ræðumaður kvöldsins og Árni Johnsen veislustjóri.
Það var mat veislugesta að þessi skemmtun hafi tekst frábærlega og því getum við lionsfélagar verið sáttir við kvöldið.
Kveðja
Gunnar Vilbergsson
Lkl.Grindavíkur
 

---

Sun. 2. mars 2008
Nýr Lionsklúbbur í Reykjavík
með fólki af erlendum uppruna
Lionsklúbburinn Concordia í Reykjavík var stofnaður sunnudaginn 24. febrúar í Lionsheimilinu í Reykjavík.
      
         Stofnfélagar ásamt Björgúlfi fjölumdæmisstjóra, Halldóri umdæmisstjóra, Haraldi
                     svæðisstjórna og Eikarkonum Ingibjörgu, Lilju, Laufeyju og Guðrúnu
Stofnfélagar eru 20 konur og karlar, á aldrinum 18–51 árs, en meðalaldur 36 ára. Flestir félagaranir eru af pólskum uppruna, en einnig eru Íslendingar meðal félagsmanna.  Stjórn klúbbsins skipa: Eva Agata Alexdóttir formaður, Flosi Sigurðsson ritari, Beata Tarasiuk gjaldkeri og Piotr Karol Murawski formaður félaganefndar og varaformaður. Krzystof Kotlarz er ljósmyndari og fréttaritari klúbbsins.  Móðurklúbbur er Lionsklúbburinn Eik í Garðabæ og eru “leiðsöguljón” (Guiding Lion) þær Lilja Guðrún Hallgrímsdóttir og Guðrún Björt Yngvadóttir. Lkl Concordia tilheyrir svæði 7 í umdæmi 109A.                   
    Stjórn Concordiu og Eikarkonur: Laufey, Beata, Eva, Piotr, Lilja og Guðrún
Okkar nýju pólsku félagar hafa búið lengi á Íslandi og eru sestir hér að til frambúðar. Þau skilja og tala íslensku og eru mörg íslenskir ríkisborgarar og vilja vera virkir Íslendingar. Undirbúningur þessa stofnfundar er búinn að vera síðan í október. Stofnskrárhátíð verður haldin innan 90 daga og verður kynnt nánar síðar.

Alþjóðaforseti Lions hvetur til breytinga og hann hvetur okkur til að bjóða fólki af erlendum uppruna í Lions.
Hann vill gera Lionshreyfinguna fjölmenningarlegri, svo hún endurspegli betur samfélagsmyndina. Við stofnum nýja klúbb með nýju fólki, sem mótar klúbbinn sinn í takt við tímann og að sínu skapi. 
Um leið og við bjóðum fólk af erlendum uppruna velkomið inn í hreyfinguna, er Lions að stíga ný skref inn í fjölmenningarlegt samfélag. Nýjir félagar sem fá tækifæri til að stofna nýja klúbba með þeim áherslum sem hentar þeim og nýjum, breyttum tímum, þeir leggja sitt af mörkum til að Lionshreyfingin á Íslandi verði í takt við tímann. Við þurfum ekki að vera hrædd við breytingar, við eigum að sjá tækifæri í breytingum eins og alþjóðaforseti Mahendra Amarasuriya segir, og hvetur hann til breytinga “Challenge to Change”.

Guðrún Björt Yngvadóttir,
varaumdæmisstjóri 109 A
Lkl. Eik Garðabæ

---

Fös, 22. feb. 2008
Klúbbarnir í Kópavogi með sykursýkismælingu á Smáratorgi
Lionsklúbbarnir í Kópavogi verða með sykursýkismælingu fyrir almenning á Smáratorgi laugardaginn 23. febrúar á milli kl. 13 og 15.   Mælingarnar munu vera teknar af fagfólki sem fengið hefur verið til þess.  

---

Fös. 15. feb. 2008
Fréttir frá Lkl. Skagastrandar.
Á febrúarfundinum þann 14 s., var Lionsfélagi Gunnar Reynisson gerður að Melvin Jones félaga.  Hann er sá fyrsti sem verður það hjá Lkl. Skagastrandar.  Þó að klúbburinn sé ungur að árum þá höfum við veitt kr 92.000 í Sight First - verkefnið. ( Á myndinni er Guðmundur Finnbogason formaður að afhenda Gunnari Reynissyni, Melvin Jones skjöldin ).  
   

Sykursýkisátak Lionshreyfingarinnar var á Þorláksmessu hjá okkur.  Það er venja að bæjarbúar komi til skötuveislu í Félagsheimilið Fellsborg í boði Fiskiðjunar og nýttum við okkur tækifærið að bjóða fólki sykursýkismælingu áður en það færi í skötunammið.  Það komu yfir 300 manns í matinn og 186 nýttu sér mælinguna og reyndist einn þurfa að fara í smá rannsókn.  Það má segja að Skagstrendingar séu ágætir til heilsunar, gagnvart þessum málaflokki. ( Á myndinni eru starfsfólk sem sáu um að mæla, Aldís Embla ( hún er með sykursýki ) Sigríður hjúkrunarfræðingur og Halldór varaformaður ).
 
Þess má geta að laugardaginn 15.mars, verður Troskvöld hjá Lkl. Skagastrandar, þar verða sjávarréttir í boði og ýmislegt haft til skemmtunar, miðaverð er kr 3.500 hefur þessi skemmtun verið ágætlega sókt og gefið okkur mest í líknasjóðinn.

 Kveðja,
Guðmundur.

---

 Fim. 7. feb. 2008
Af starfi Lionsklúbbs Grundarfjarðar.
Lionsklúbbur Grundarfjarðar var 35 ára á síðasta ári þó þessara tímamóta hafi ekki verið minnst á opinberan hátt var einn fundur klúbbsins tileinkaður afmælinu sérstaklega. Þá tók Njáll Gunnarsson saman punkta um starf klúbbsins frá því hann var stofnaður 1972 og mun sú samantekt birtast í næstu útgáfu af Fólkið – fjöllin – fjörðurinn. Fastir punktar í starfi klúbbsins í fjáröflun er sala fermingarskeyta á vorin, sala á fiskisúpu á Góðri stundu, og síðan sala á lifandi jólatrjám og öðrum jólavarning í desember. Meðal fastra verkefna er uppsetning miðbæjarjólatrésins, og heimsókn á Kvíabryggju á aðfangadag jóla. Lionsfundir eru einu sinni í mánuði í Fákaseli, en stærri fundir eins og kúttmagakvöld og jólafundir eru haldnir í stærra rými á veitingastöðunum og í  samkomuhúsinu. Félagar í klúbbnum eru nú um 30 talsins en 6 nýir félagar bættust í hópinn á jólafundi rétt fyrir áramótin. Markmið með starfsemi Lionsklúbba er að láta gott af sér leiða  og vera uppbyggjandi félagsskapur. Fjáraflanir klúbbsins fara í sérstakan líknarsjóð sem að stærstum hluta er úthlutað  úr til verkefna í heimabyggð. Á fundi í nóvember var ákveðið að gefa Grundarfjarðarkirkju nýja sjónvarpsmyndavél.    Næsta verkefni klúbbsins tengist heilsufari og sérstöku átaki til að fyrirbyggja sjúkdóma af völdum sykursýki. Í samstarfi við Heilsugæsluna í Grundarfirði verður efnt til  léttrar gönguferðar laugardaginn 9. febrúar og síðan boðið upp á blóðsykurmælingu í Heilsugæslustöðinni.
                     
Nýir félagar í Lionsklúbbi Grundarfjarðar.
Jónheiður Haraldsdóttir, Finnur Hinriksson,  Guðmundur Ingi Gunnlaugsson, Ágúst Jónsson og Anna María Reynisdóttir. Á myndina vantar Maríu Busk sem var upptekin vegna vinnu sinnar á Sjúkrahúsinu í Stykkishólmi. Ljósmynd Salbjörg Nóadóttir.
 

Er eitthvað að frétta frá klúbbstarfinu?                                 
Er eitthvert verkefni framundan í klúbbnum þínum?  Stendur mikið til í félagsstarfinu, eitthvað sem gaman væri að kynna?  Sendið þá stutta grein inn á þessa síðu.  
Netfangið hjá umsjónarmanni síðunnar er: halldor hjá tv.is

 

                                                                    Síðan uppfærð 03. nóvember 2009